បាត់ដំបង៖ ក្រុមការងារថ្នាក់ជាតិដែលដឹកនាំដោយរដ្ឋលេខាធិការក្រសួងរៀបចំដែនដីនគររូបនីយកម្ម និងសំណង់លោក ប៉ែន សុផល បានរកឃើញការកាប់ទន្ទ្រានដីព្រៃលិចទឹកបឹងទន្លេសាបក្នុងភូមិសាស្ត្រខេត្តបាត់ដំបងមានចំនួន ១២ ២២១ហិកតា និងបានណែនាំដល់ឲ្យរកអ្នកពាក់ព័ន្ធនៅពីក្រោយការកាប់ទន្ទ្រាននេះផងដែរ។

ក្នុងកិច្ចប្រជុំជាមួយអភិបាលខេត្តបាត់ដំបងលោក សុខ លូ នៅថ្ងៃទី៣០ ខែវិច្ឆិកានេះ ក្រុមការងារបានរកឃើញថាក្នុងខេត្តបាត់ដំបងមានការទន្ទ្រានដីព្រៃបឹងទន្លេសាបក្នុងស្រុកចំនួន៤ មានស្រុកមោងប្ញស្សីចំនួន ២ ២១៤ហិកតា ស្រុកសង្កែ ចំនួន ៦ ១១៤ហិកតា ស្រុកឯកភ្នំចំនួន ៣ ០៥៣ហិកតា និងស្រុកថ្មគោលចំនួន ៨៣៨ហិកតា ទន្ទឹមនឹងនោះក៏មានការខូចខាតដោយភ្លើងឆេះព្រៃ សរុបចំនួន ២០ ៩៤៧ ហិកតាផងដែរ។

វិធានការរបស់ក្រុមការងារថ្នាក់ជាតិមាន៤គឺ ការកំណត់យាមការ ស្វែងរកអ្នកទន្ទ្រាននិងអ្នកនៅពីក្រោយ ការរៀបចំទិន្នន័យ និងត្រូវដាំដើមឈើឡើងវិញត្រង់ចំណុចគោលដៅឬព្រំប្រទល់ដីលិចទឹក។

កាលពីម្សិលមិញអាវុធហត្ថខេត្តបាត់ដំបងបានឃាត់ខ្លួនមនុស្សចំនួន៧នាក់ពាក់ព័ន្ធនឹងករណីឈូសឆាយដីព្រៃលិចទឹកនៅត្រង់ចំណុចអូរកំបុត ស្ថិតក្នុងភូមិ ព្រែកឆ្ពោ ឃុំពាមឯក ស្រុកឯកភ្នំ ខេត្តបាត់ដំបង និងកំពុងកសាងសំណុំរឿងបញ្ជូនទៅតុលាការ។

កាលពីថ្ងៃអាទិត្យ ទី២៨ ខែវិច្ឆិកា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ បានបញ្ជាឱ្យអាជ្ញាធរពាក់ព័ន្ធចុះស្រាវជ្រាវនិងបង្ក្រាបជនល្មើសទន្ទ្រានដីទឹកបឹងទន្លេសាបយកមកអនុវត្តន៍ទោស និងឱ្យអង្គភាពប្រឆាំងអំពើពុករលួយបើកការស៊ើបអង្កេតផងដែរ។

សម្ដេចតេជោបានលើកឡើងថា៖ «យើងមិនអាចអត់ឱនបានទេនៅពេលដែលយើងកំពុងខិតខំប្រយុទ្ធជាមួយកូវីដ-១៩ បែរជាមានមន្ត្រីរបស់យើងមួយចំនួនធ្វើសកម្មភាពដោយគ្មានការទទួលខុសត្រូវ គ្មានការក្រែងរអែងដល់ច្បាប់ និងប្រទេសជាតិ។ អ្នកទាំងនេះមិនសក្តិសមធ្វើជាមន្ត្រីតទៅទៀតទេ! មានតែដេកគុកប្រសើរជាងនៅជាមន្ត្រី។ ហើយសុំកុំនិយាយថាធ្វើការជូនបក្សជូនរដ្ឋយូរហើយ បែរជាគណបក្សមិនយកយល់។ យើងគ្មានការយកយល់ណាសម្រាប់អំពើទុច្ចរិតបែបនេះដល់មន្ត្រីរបស់យើងនោះទេ»។

ការចេញវិធានការក្ដៅរបស់សម្ដេចតេជោនៅពេលនេះគឺបន្ទាប់ពីសម្ដេចតេជោទទួលបានរបាយការណ៍ពីប្រធានរាជបណ្ឌិត្យសភាកម្ពុជាលោកបណ្ឌិត សុខ ទូច ពាក់ព័ន្ធនឹងការកាប់ទន្ទ្រាននិងឈូសឆាយដីលុបបឹងទន្លេសាប។

បើតាមសម្ដេចដីដែលរឹបអូសបានមកវិញនេះនឹងត្រូវអភិរក្សដើម្បីដាំដើមឈើ ព្រៃលិចទឹកសារជាថ្មីឡើងវិញដើម្បីជាប្រយោជន៍ធនធានធម្មជាតិ ជំរកត្រី និងប្រព័ន្ធអរកូឡូស៊ី៕